Манай Улсын Барилгын салбар эдийн засгийн нөхцөл байдлыг даган жил ирэх тутам илүү чадварлаг мэргэжилтэн, бүтээлч хандлагатай ажилтанг шаардаж байна. Энэхүү хямралын хүнд үеийг даван туулах зорилтын хүрээнд салбарын удирдлагууд, инженер, техникийн ажилтны чадвар, чадамжийг дээшлүүлэх, чадварлаг баг хамт олныг бүрдүүлэх шаардлага тулгараад байна. Гишүүддээ хувь хүний хөгжил, харилцааны соёл, ажилд хандах хандлага, бүтээмж чанар, багийн ажиллагаа, байгууллагын удирдах ажилтнуудад зориулсан менежментийн сургалтуудыг байгууллагын захиалга, танхимын болон онлайн хэлбэрээр явуулахаас гадна инженер техникийн ажилтнуудыг мэргэшүүлэх, мэргэжил дээшлүүлэх сертификатжуулсан сургалтуудыг практиктай хослуулан зохион байгуулна.

Хэдийгээр мэдээллийн эрин зууны үе эхэлж, нээлттэй олон сувгаар маш олон төрлийн мэдээлэл цацагдаж байгаа ч барилгын гүйцэтгэгч байгууллагуудад бодит, үнэн зөв, шинэ мэдээлэл байнга л хэрэгцээтэй хэвээр байгаа.  Түүнчлэн мэдээлэл олж авах эх үүсвэр хүн бүрт хүртээмжтэй бус, хаанаас хэрхэн авахаа мэдэхгүй байх, барилгын байгууллагууд цаг зав багатайгаас мэдээллээс хоцрох байдал тохиолддог бөгөөд мэдээлэл дутмагаас хүмүүс аливаа сайн боломжийг алдах, мэдэхгүй өнгөрөх, цаг алдах, бизнесийн боломжийг алдах мөн бизнесийн эрсдэлд учрах зэргээр бэрхшээлтэй тулгардаг. Иймд бид барилгын салбарын мэдээ, мэдээлэл, хууль эрх зүй, төсөл хөтөлбөр, тендер, ном товхимол, гарын авлагыг цаг алдалгүй гишүүддээ хүргэнэ.

Бид салбартаа төдийгүй улс орондоо бүтээл зүтгэлээрээ тод томруун ялгарах орчин үеийн удирдлага зохион байгуулалттай, тэргүүний техник технологитой, олон улсын томоохон төсөл хөтөлбөрүүд дээр ажиллах чадамж бүхий дэлхийд хүлээн зөвшөөрөгдсөн барилгын гүйцэтгэгч байгууллагуудыг бэлтгэхэд хувь нэмрээ оруулахын тулд бизнесийн болон мэргэжлийн зөвлөх үйлчилгээг гишүүддээ хүргэж, хамтарсан төсөл хөтөлбөрүүд хэрэгжүүлнэ.

Монголын Барилгын салбарт ажиллаж хөдөлмөрлөж байгаа болон шинээр энэ салбарт хөл тавьж буй залуу удирдлагууд, инженерүүдэд тулгамдаж буй олон асуудлууд байдаг. Дээд боловсрол эзэмшсний дараах мэргэжлийн сургалтуудаас гадна хоорондоо танилцаж мэдээлэл солилцох, мэдээллээр хангах, харилцан туршлага солилцох боломж тэр бүр байдаггүй билээ. Холбоо нь гишүүн байгууллагуудын хөгжил болон хувь хүний хөгжлийг нэмэгдүүлэх, мэдээлэл солилцох, туршлага хуваалцах, өөрсдийгөө хөгжүүлэх зорилго бүхий клуб, салбар зөвлөлүүдтийг санаачлан байгуулж ажиллана.Мөн холбооноос зохион байгуулах үйл ажиллагаануудад хамрагдах боломжтой.